هل لديكم حل اخر لهذه المشكلة؟
أنا شاب، مشكلتي إني خاطب من أربع سنين، ومن أول خطوبتي بتحصل حاجات غريبة من خطيبتي؛ مع العلم إن خطوبتنا عن حب؛ لكني فوجئت إن صديق لينا بلّغني إنه كلّمها عن مشاعره ووافقت، ولما واجهتها بالأمر أنكرت، وقالت إنها بتحبني أنا، وصممت على كده، وهو بِعِد.
المهم بعد كده كنت باتفاجأ على الإيميل بتاعها بزمايلها في الجامعة أكتر من واحد بيعبّر لها عن حبه، وكنت باواجهها، وتقول إن دول عيال، وأنا بحبك إنت، وكلام زي ده، وفي رسالة منهم كان بيكلمها عليّ، وإنها قالت له إنها هتسيبني، وهو بيسألها إنتِ قلتِ لخطيبك ولا لسه.
المهم هي دلوقتي خلّصت وقالت: خلاص ارتحت من الجامعة؛ لكن بعدها راحت اشتغلت في شركة، وبرضه لقيت واحد زميلها في الشغل باعت ليها كلام قذر جنسي، وواجهتها، ونفت إنها على علاقة بيه، واتصلت بزمايلها في الشغل وزميلها اللي باعت الرسالة، وهو نفى وقال: يمكن يكون حد سرق الإيميل، وأنا ماعملش كده.. وبعديها بفترة طويلة لقيت زميلها التاني برضه باعت رسالة حب وجنس، وإنهم كانوا مرتبطين لدرجة إنهم كانوا قربوا يتجوزوا.
أنا اللي هيجنني إن مافيش حاجة جابراها عليّ؛ يعني لو عايزة تسيبني، كان ممكن بسهولة.. طيب ليه متمسكة بيّ ومستنية عليّ 4 سنين، ومستحملة معايا؛ مع إنها حلوة جداً وبتحبني وبتعامل أهلي كويس جداً، وكل اللي يقابلها يحبها ويحسدني عليها.
أنا محتار جداً، مش عارف: أسيبها وهي فعلاً خاينة؟ ولا كل ده هي مالهاش ذنب فيه؟ لدرجة إني تخيّلت إنها ممكن تكون عندها مرض نفسي.